歡迎參加《台文通訊——30冬紀念特刊》【線頂】Webex新冊發表會

活動時間：4/9/2022 台灣時間 22:00 - 00:00 

參加活動： https://natwa.webex.com/meet/taigi

活動議程：請參考附件PDF檔案

關鍵時代ê關鍵刊物

每一个關鍵年代lóng 會出現關鍵刊物。十九世紀台灣tng teh kiâⁿ ǹg現代化ê時，tī 1885年出現第一份台語白話字（Pe̍h-ōe-jī）報紙《Tâi-oân Hú-siâⁿ Kàu-hōe-pò》（台灣府城教會報），創造台灣新文化hām新文學。鄭南榕tī 1984年創辦ê《自由時代周刊》mā ín-chhōa台灣人民爭取主張台灣獨立建國ê自由。1991年發行ê《台文通訊》是台灣解嚴以後ín-chhōa台灣人思考「喙講台語、手寫台文」、建立台灣民族語文主體性ê重要刊物。

Hām真chē hông殖民ê國家仝款，文化hām政治ê啟蒙運動lóng 先ùi外國thòaⁿ tńg-lâi國內。戰後ê台灣語文mā是án-ne，其中美國hām日本是二條真重要ê台語文路線。美國ê台語文運動ē-sái ùi台僑tī 1977年發行《台灣語文月報》開始算起。台灣語文月報ê主要參與者有李豐明、陳清風、鄭良偉。鄭良偉教授hit chūn tī美國Hawaii大學東亞語文學系教冊，伊算是語言學界公開有意識ê主張台語文寫作ê重要學者之一。伊ê小弟鄭良光siū伊ê影響tī加州LA台灣人社群實踐台語文運動。鄭良光就是1991年創刊ê《台文通訊》ê發行人。因為台語文ê主戰場tī台灣，só͘-pái《台文通訊》tī LA創刊liáu真緊就台美siâng-sî發行，透過陳明仁、陳豐惠hām廖瑞銘tī台灣發展草根組織。

雖罔《台文通訊》毋是1990年代唯一ê台文雜誌，m̄-koh伊有kúi項真重要ê貢獻：

第一，主張koh實踐漢羅合用ê台文書寫方式。雖罔台語白話字tī 19世紀就出現tī台灣而且tī教會內底普遍tek使用，戰後接受中華民國教育大漢ê新世代台灣人多數kan-taⁿ bat漢字、m̄-bat白話字。因為chit ê緣故，1990年代hit chūn iáu有袂少人認為台語文ê書寫tio̍h ài用漢字。《台文通訊》透過論述hām實踐證明漢羅方式有法度書寫台語文。

第二，戰後發行siōng久ê台文雜誌。台語白話字報紙《Tâi-oân Hú-siâⁿ Kàu-hōe-pò》ùi 1885 年發行到1969年被迫改做中文出版lóng-chóng發行84冬，算是台灣史siōng發行siōng久ê台語雜誌。若戰後新發行ê刊物內底，發行siōng久ê台文雜誌算是《台文通訊》。伊tī久長中國話霸權體制之下提供台灣人用台灣話書寫發表ê重要平台。

第三，提供白話字發表ê空間。台語白話字是台灣ê文化資產mā是傳統台語音素文字。M̄-nā án-ne，因為傳教士ê關係，白話字mā是國際化ê文字。持續使用白話字chiah ē-tàng兼顧台灣主體性hām國際化。

第四，堅持台語文hām台灣ê主體性。語言hām政治是一體二面，互相有牽連。若kan-taⁿ有語言soah無台灣意識，án-ne台語就kan-taⁿ是中國ê閩南語。《台文通訊》創刊ê時chit ê堅持踏kah真硬mā真明顯。未來mā tio̍h繼續落去。

第五，透過讀者聯誼會發展草根組織。《台文通訊》m̄-nā是文字出版ê單位，mā是chhui-sak台語文ê草根組織。因為án-ne，伊ê讀者hām支持者siōng chē，chiah ē-tàng維持發行到taⁿ。